Kliment Kolesnikow suwda ýüzmek boýunça Russiýanyň kubogynyň finalynyň ýarym final ýüzüşinde 50 metr aralyga arkanlygyna ýüzmekde täze dünýä rekordyny goýdy. Ýaryş Kazanda geçirilýär. Bu barada TASS habar berýär.
Kolesnikow 23,55 sekunt netijäni görkezdi. Öňki dünýä rekordy (23,71) amerikaly Hanter Armstronga degişli bolup, 2022-nji ýylda goýlupdy.
Kolesnikow 23 ýaşynda, ol 100 metr aralyga arkanlygyna ýüzmekde Tokioda geçirilen Olimpiýa oýunlarynyň kümüş baýrakçysy we 100 metr aralyga erkin usulda ýüzmekde Oýunlaryň bürünç baýrakçysydyr. Kolesnikow gysga suwda ýüzmek boýunça alty gezek dünýä çempiony, alty gezek Ýewropa çempiony, 2019-njy ýylda geçirilen dünýä çempionatynyň üç gezek baýrakçysydyr.
Suwda ýüzmek boýunça Russiýanyň kubogynyň finaly 30-njy iýulda tamamlanar.
