Adybir sosial ulgama eýe bolan Twitter käbir awtorlara mahabat girdejilerini paýlaşmaga mümkinçilik berýän täze bir aýratynlygy yglan etdi. Trend-iň habar bermegine görä, bu baradaky beýanat anna güni kompaniýanyň resmi web sahypasynda çap edildi.
Beýanatda: "Mazmunyň awtorlary üçin pul gazanmak teklibimizi giňeldýäris. Indi biz mahabat girdejilerini paýlaşmak funksiýasyny girizýäris" diýilýär. Twitter bu täzeligiň awtorlara sosial ulgamda mydama girdeji gazanmaga we mazmunyndan pul gazanmaga mümkinçilik berjekdigini aýdyňlaşdyrýar. Agzalan funksiýa diňe Twitter-iň hyzmatdaşy bolan Stripe töleg ulgamynyň işleýän ýurtlarynda elýeterli bolar.
Girdejileri paýlaşmak maksatnamasyna girmek üçin Twitter Blue-a abuna ýazylan tassyklanan hasap eýesi bolmaly we ýazgylary yzygider üç aýyň dowamynda azyndan 5 million gezek görülmeli. Girdejileri paýlaşmak maksatnamasyna gatnaşmak üçin arzalar ýakyn wagtda kabul edilip başlanar.
Aprel aýynda Twitter -iň başlygy Ilon Mask sosial ulgamda ulanyjy mazmunyny monetizasiýa etmek üçin programmanyň başlandygyny habar beripdi. Şeýle hem, Twitter öz mazmunyny tanatmak üçin awtorlara goldaw bermegi meýilleşdirýär.
