Prezident Serdar Berdimuhamedow 6 aýyň jemlerine bagyşlanyp geçirilen Hökümet mejlisiniň barşynda eden çykyşynda ýolbaşçylara bir aýlyk dynç alşa çykmaga rugsat berdi. Bu barada «Watan» habarlar gepleşiginde habar berildi.
Döwlet Baştutany geçen ýarym ýylyň görkezijileriniň, ýurdumyz boýunça erbet bolmandygyny aýtmak bilen, ähli ministrlikleriň we pudak edaralarynyň ýolbaşçylaryna geçen alty aýda edilen işleriň netijeleri boýunça öňümizdäki şenbe, ýekşenbe we duşenbe günleri maslahatlary geçirmegi tabşyrdy.
Şeýle hem Serdar Berdimuhamedow oba hojalyk toplumynyň ýolbaşçylaryndan hem-de welaýat häkimlerinden beýleki ýolbaşçylara 1-nji awgustdan 1-nji sentýabra çenli dynç almaga rugsat berýändigini yglan etdi. Hemişe bolşy ýaly, ýurdumyzyň ýolbaşçy düzümleri Awazada, Arçmanda we Ýylysuwda ýa-da ýurdumyzyň beýleki şypahanalarynda dynç alyp bilerler.
