Şu gün Prezident Serdar Berdimuhamedowyň gatnaşmagynda ýurdumyzda ilkinji «akylly» Arkadag şäheriniň açylyşy mynasybetli giň möçberli dabaralara badalga berildi.
Ir bilen «Akhan» binasynyň ýanyndaky meýdançada «akylly şäheriň» açylyşy mynasybetli dabaralara badalga berildi.
Meýdançada Türkmenistanyň döredijilik toparlarynyň ýerine ýetirmeginde aýdym-sazly kompozisiýa ýaýbaňlandyryldy.
Döwlet Baştutany belent mertebeli myhmanlar bilen ady rowaýata öwrülen Akhan bedewiniň keşbini janlandyrýan binanyň ýanyna bardylar we ony açdylar.
«Akhan» binasynyň üstüni örtýän örtük aşak düşürlende dürli reňkli howa şarlary dabaraly saz astynda ýokary uçuryldy we binanyň esasynda bolsa suw çüwdürimleri işläp başladylar.
Soňra Prezident Serdar Berdimuhamedow we belent mertebeli myhmanlar Arkadag şäheriniň Baş meýdançasyna bardylar.
Dabaraly ýagdaýda Türkmenistanyň Döwlet senasy ýaňlandy we Watanymyzyň Döwlet baýdagy ýokaryk galdyryldy.
Şeýle hem dabaralaryň çäklerinde «Arkadag» binasynyň açylyşy boldy.
Arkadag şäheriniň açylyşy mynasybetli giň möçberli dabaralar dowam edýär.
