NBC-niň habar bermegine görä, 2024-nji ýylda Parižde geçiriljek Olimpiýa oýunlarynyň guramaçylary Olimpiýa alawynyň estafetasynyň ugrunyň jikme-jikliklerini mälim etdiler. Onuň dowamynda alaw göterijiler Fransiýanyň iň meşhur taryhy ýerlerine baryp görerler.
2024-nji ýylda geçiriljek Olimpiýa oýunlarynyň alawy 16-njy aprelde Olimpiýada ýakylar we şondan soň Gresiýada dokuz gün bolar. Soňra üç bogaldakly “Belem” gämisinde Ortaýer deňziniň aňyrsyndaky Marsel portuna eltiler. Guramaçylaryň aýtmagyna görä, Gomer döwrüni ýada salýan bu gämi birgiden gaýyklar toparynyň ugratmagynda Fransiýanyň kenaryna geler.
Estafetanyň fransuz bölegi 8-nji maýdan 26-njy iýul aralygynda 68 gün dowam eder, şol sanda 8-nji iýundan 17-nji iýuna çenli deňiz aňyrsyndaky sebitlerde: Fransiýanyň Gwianasynda, Reýunýonda, Taitide, Gwadelupde we Martinikde geçer.
Fransiýada Olimpiýa alawy 64 sebitdäki 400-den gowrak şähere baryp görer. Estafeta “D-Day”-iň, Mon Sen-Mişeliň plýaž kenarlaryndan, Wersal köşgünden, Kanndan, “Roland Garros”-yň çäginden we köp sanly meşhur üzümçilikleriň we muzeýleriň üstünden geçer.
10 000 sany özbaşdak alaw göterijiniň hersi 200 metr töweregi ylgar, üstesine-de 3000 sany fakel göteriji toparlaýyn estafeta ýaryşlaryna gatnaşar.
2024-nji ýylyň Olimpiýa oýunlarynyň açylyş dabarasy 26-njy iýulda geçiriler.
