24-nji iýunda Prezident Serdar Berdimuhamedow Welosipedçileriň halkara birleşiginiň (UCI) wise-prezidenti, Aziýa welosport konfederasiýasynyň prezidenti Osama Al Şafary kabul etdi.
Serdar Berdimuhamedow myhmany mübärekläp we oňa hoşniýetli sözleri üçin minnetdarlyk bildirip, bu gezekki saparyň çäklerinde welosiped sporty boýunça hyzmatdaşlygyň häzirki ýagdaýyny we geljekki ugurlaryny ara alyp maslahatlaşmak, ýurdumyzda welosiped sportunyň ösdürilişi bilen tanyşmak üçin mümkinçilikleriň dörediljekdigine ynam bildirdi we geçiriljek gepleşiklerde üstünlik arzuw etdi.
Döwlet Baştutanynyň belleýşi ýaly, Türkmenistan sportuň ähli görnüşleri boýunça iri halkara ýaryşlaryny geçirmäge ukyplydyr we Aşgabadyň Olimpiýa şäherjigindäki ajaýyp ýapyk welotrek binasyny ulanmagyň mümkinçiliklerine garamaga taýýardyr.
Öz gezeginde Welosipedçileriň halkara birleşiginiň wise-prezidenti, Aziýa welosport konfederasiýasynyň prezidenti Osama Al Şafar Türkmenistanyň iri sport ýaryşlaryny birkemsiz guramakda tejribe toplandygyny, bu bolsa ýurdumyzda dünýä ýaryşlaryny ýokary guramaçylyk derejesinde geçirmekde ygtybarly binýat bolup hyzmat etjekdigini nygtady.
Duşuşygyň çäklerinde Serdar Berdimuhamedow we myhman özara düşünişmegiň ýokary derejesine eýe bolan ikitaraplaýyn hyzmatdaşlygyň möhüm meseleleri boýunça pikir alyşdylar. Osama Al Şafaryň Türkmenistanyň Mejlisi bilen Birleşen Arap Emirlikleriniň Federal Milli Geňeşiniň arasyndaky parlamentara dostluk toparynyň Emirlikler böleginiň başlygy bolup durýandygyny belläp, Serdar Berdimuhamedow ýurdumyzyň BAE bilen iki döwletiň halklarynyň abadançylygynyň bähbidini esasy ugur edinýän dostluk gatnaşyklaryny mundan beýläk-de berkitmäge gyzyklanma bildirýändigini aýtdy.
