Prezident Serdar Berdimuhamedow orta we uzak möhletleýin geljek üçin durmuş-ykdysady döwlet syýasatynda peýdalanmak maksady bilen, 2022-nji ýylyň dekabr aýynda geçirilen ilat ýazuwynyň maglumatlaryny ýene-de bir gezek içgin öwrenmegiň zerurdygyny aýtdy. Şu babatda döwlet Baştutany wise-premýer H.Geldimyradowa Ministrler Kabinetiniň şu ýylyň birinji ýarymynyň jemlerine bagyşlanyp geçiriljek mejlisinde giňişleýin hasabat bermegi tabşyrdy. Bu barada «Watan» habarlar gepleşiginde habar berildi.
Anna güni geçirilen Hökümet mejlisiniň barşynda wise-premýer H.Geldimyradow 2022-nji ýylyň dekabr aýynda «Ilat ýazuwy — 2022: Jebislik. Bagtyýarlyk. Röwşen geljek» şygary astynda geçirilen Türkmenistanyň ilatynyň we ýaşaýyş jaý gorunyň uçdantutma ýazuwynyň netijeleri barada hasabat berdi.
Bellenilişi ýaly, döwlet derejesindäki bu çäre ýurdumyzyň ähli sebitlerinde sanly tehnologiýalary ulanmak arkaly geçirildi. Uçdantutma ýazuwda toplanan maglumatlar umumylaşdyryldy we degişli görkezijiler boýunça ulgamlaşdyryldy.
Serdar Berdimuhamedow toplanan maglumatlaryň ozalky şeýle çäräniň geçirilen wagtyndan bäri geçen döwürde demografik, durmuş we ykdysady görkezijilerdäki üýtgeşmeleri görkezmek bilen çäklenmän, eýsem, milli ykdysadyýetimizi ýakyn ýyllarda ösdürmek üçin hem möhüm maglumat çeşmesi bolup hyzmat edýändigini belledi.
