Ýakyn günlerde biz Arkadag şäheriniň birinji tapgyryny dabaraly ýagdaýda açyp, ulanmaga bereris diýip, Prezident Serdar Berdimuhamedow 16-njy iýunda Arkadag şäherinde geçirilen Ministrler Kabinetiniň giňişleýin göçme mejlisinde belledi. Bu barada Türkmenistanyň Halk Maslahatynyň saýty habar berýär.
2019-njy ýylda gurluşygy badalga alan, ýurdumyzdaky ilkinji «akylly» şäher bolan Arkadag şäheri iki tapgyrdan ybaratdyr. Häzirki wagtda onuň birinji tapgyrynyň gurluşygy tamamlandy.
«Akylly» şäher konsepsiýasy esasynda gurlan Arkadag şäheriniň birinji tapgyrynda jemi 336 sany döwrebap desga bina edildi. Şolaryň arasynda iki we köp gatly, jemgyýetçilik, bilim, saglygy goraýyş hem-de medeni binalar, sport desgalary we inžener ulgamlary bar.
Täze şäherde ähli işler dünýä ölçeglerine laýyklykda, ýokary hilli amala aşyryldy. Okuw mekdeplerinde sanly ulgam, ýaşaýyş jaýlarynda bolsa, «akylly öý» ulgamy ornaşdyryldy.
Täze Arkadag şäheri häzirki zamanyň ýaşamak we işlemek, dynç almak üçin iň amatly, kämil şäherleriniň biri boldy diýip, Prezident Serdar Berdimuhamedow belledi.
