Bahreýn agyr atletika boýunça 2024-nji ýyldaky dünýä çempionatyny kabul etmekde dalaşgärleriň arasynda ýeňiş gazandy. Bahreýn bilen birlikde bu wezipä Ermenistan we Albaniýa dalaş etdi.
Bahreýniň agyr atletika federasiýasynyň prezidenti, Aziýanyň agyr atletika federasiýasynyň iň ýaş geňeş agzasy Eshak Ebrahim Eshak Halkara Agyr atletika federasiýasyna ynam bildirenleri üçin çuňňur minnetdarlyk bildirdi we ýatdan çykmajak ýaryşlary geçirjekdigini aýtdy.
Çempionat Bahreýniň paýtagty Manamada geljek ýylyň noýabr-dekabr aýlarynda, Parižde boljak Olimpiýa oýunlaryndan birnäçe aý soň geçirmek meýilleşdirilýär.
Geçen ýylyň oktýabr aýynda Bahreýnde geçirilen Agyr atletika boýunça Aziýa çempionatyna Halkara agyr atletika federasiýasy (IWF) tarapyndan ýokary baha berlendigini bellemelidiris. Soňra IWF-iň başlygy Muhammet Jalud Al-Şammari Bahreýniň sportuň bu görnüşi boýunça dünýä çempionatyny geçirmek üçin ähli mümkinçilikleriniň bardygyny aýtdy.
