6-njy iýunda BMG-niň Baş Assambleýasy BMG-niň Howpsuzlyk Geňeşiniň hemişelik däl bäş agzasynyň saýlawlaryny geçirdi. Gündogar Ýewropa toparyndan bir orun üçin iki ýurt dalaş etdi - Sloweniýa 153 ses, Belarus - 38 ses aldy. 2024-nji ýylyň ýanwaryndan BMG-niň Howpsuzlyk Geňeşine Sloweniýadan başga-da, Alžir, Gaýana, Koreýa Respublikasy we Sýerra Leone hem goşular. Olar Geňeşiň hemişelik däl beýleki bäş agzasynyň - Gabonyň, Gananyň, Birleşen Arap Emirlikleriniň, Albaniýanyň we Braziliýanyň ornuny tutarlar.
Howpsuzlyk Geňeşine geçirilen saýlawlarda dalaşgär ýygnananlaryň we gizlin ses berenleriň sesleriniň üçden iki bölegini almaly. Munda zaýalanan býulletenler hasaba alynmaýar.
Howpsuzlyk Geňeşine 15 ýurt gatnaşýar, olaryň bäşisi - Hytaý, Fransiýa, Russiýa, Beýik Britaniýa we ABŞ - Geňeşiň hemişelik agzalary. Baş Assambleýa, dalaşgäriň halkara parahatçylygy we howpsuzlygy üpjün etmäge, şeýle hem geografiki taýdan adalatly paýlanyşa gatnaşyş derejesini göz öňünde tutup, Howpsuzlyk Geňeşiniň hemişelik däl agzalary hökmünde beýleki 10 ýurdy saýlaýar.
Howpsuzlyk Geňeşiniň hemişelik däl agzalary iki ýyllyk möhlete saýlanýar, şondan soň agzalykdan çekilýän ýurt derrew gaýtadan saýlanyp bilinmez.
