Dört möwsümde ilkinji gezek dünýäniň iň gymmat futbol brendleriniň sanawynda lider üýtgedi: iňlisleriň “Mançester Sitisi” Madridiň “Realyny” birinji setirden düşürdi. Ýatlatsak, ýazyň ahyrynda "ManSiti" we "Real" Çempionlar ligasynyň ýarym finalynda duşuşdy, şonda Hosep Gwardiolanyň topary Ispaniýanyň öňki çempionlaryny esasy Ýewropa ýaryşyndan utup çykardy. Indi iňlisler başga bir abraýly kategoriýada-da “Realdan” öňe geçdiler.
Däp bolşy ýaly, dünýä futbolynda iň gymmat brendleriň reýtingini meşhur Brand Finans konsalting kompaniýasy düzýär. Dört ýyl bäri bu klassifikasiýanyň başyny Madridiň “Realy” çekip geldi, indi öň hatara Mançesteriň "şäherlileri" çykdylar.
“Mançester Siti” brendiniň umumy bahasy häzirki wagtda 1,51 milliard funt sterling bolup, geçen ýyl bilen deňeşdirilende, 13 göterim ýokarlandy. “Real” biraz -1,46 milliard funt sterling yzda, “Patyşa klubunda” hem ösüş boldy, ýöne o diýen uly däl. Sanawda üçünji orunda Ispaniýanyň täze çempiony "Barselona" (1,37 milliard ýewro) barýar. Öňdebaryjy futbol brendleriniň arasynda ilkinji 6-lykda iňlis “Mançester Ýunaýtedi” (1,36 milliard ýewro), “Liwerpul” (1,36 milliard) we Fransiýanyň “Pari Sen-Žermeni” (1,13 milliard) durýar.
Ýedinji ýer 11 gezek Germaniýanyň çempiony bolan “Bawariýa” (1,10 milliard ýewro) degişlidir. Iň gymmatly brendleriň ilkinji onlugynda Angliýanyň premýer-ligasyndan ýene üç topar bar: “Arsenal” (0.91 milliard), “Tottenham” (0,90 milliard) we Çelsi (0,86 milliard).
