2023-nji ýylyň ahyryna çenli eplenýän smartfonlaryň üpjünçiligi 19,8 mln birlige ýeter, bu bolsa geçen ýyldaky 12,8 mln gurluş görkezijisinden 55% köpdür. Bu barada TrendForce analitik kompaniýasynyň täze hasabatynda aýdylýar diýip, gazeta.ru habar berýär.
Eplenýän smartfonlaryň meşhurlygynyň ýokarlanmagyna OLED ekranlary we ýörite şarnirler ýaly esasy komponentleriň bahasynyň arzanlamagy täsirini ýetirýär. Bu bölekleriň arzanlamagy bolsa smartfonlaryň ahyrky bahasynyň arzanlamagyna getirýär.
Şeýle-de, bahanyň arzanlamagyna we meşhurlygyň ösüşine barha ýitileşýän bäsdeşlik hem täsir edýär. Samsung henizem eplenýän gajetleri bazara ibermekde öňdebaryjylygy saklaýar, ýöne Huawei hem lideriň yzyndan ýetmäge ymtylýar. Şeýle-de, soňky birnäçe ýylda bu ýaryşa Oppo, Vivo, Xiaomi, Honor we Tecno ýaly brendler hem goşuldy.
TrendForce-yň maglumatlaryna görä, 2020-nji ýylda tutuş smartfon bazarynyň bary-ýogy 0,4%-i çeýe ekranly smartfonlaryň paýyna düşýärdi. 2023-nji ýylda bu görkeziji 1,7%-e çenli ýokarlanar. 2027-nji ýylyň ahyryna çenli bolsa “eplenýänler” smartfon bazarynyň 5,3%-ini eýelär.
