Dünýäde ikinji uly sport harytlaryny öndüriji bolan Germaniýanyň Adidas AG kompaniýasy Yeezy brendiniň galan ätiýaçdaky krossowkalaryny satmagy we alnan serişdeleri haýyr-sahawata gönükdirmegi meýilleşdirýär. Bu barada kompaniýanyň paýdarlaryna onuň baş ýerine ýetiriji müdiri Býorn Gulden habar berdi diýip, interfax.ru belleýär.
Adidas sazanda Kanýe Uest bilen hyzmatdaşlykda döredilen brendiň önümlerini geçen ýylyň oktýabr aýynda satmagy bes etdi. Şonda kompaniýa antisemit sözleri sebäpli Uest bilen hyzmatdaşlyk şertnamasyny ýatyrdy.
Adidasyň paýdarlarynyň penşenbe güni geçirilen ýyllyk ýygnagynda Gulden Yeezy-nyň satylmadyk ätiýaçdaky harytlarynyň 1 mlrd ýewrodan gowrak mukdar bilen bahalandyrylýandygyny belledi.
Gulden kompaniýanyň brendiň önümlerini ýok etmän, wagtyň geçmegi bilen onuň bir bölegini satmaga synanyşmak we satuwdan alnan serişdeleri Uestiň sözlerinden ejir çeken adamlara wekilçilik edýän guramalara ibermek kararyna gelendigini aýtdy.
Adidasyň paýnamalary penşenbe güni söwdada 2,2% gymmatlady. Ýylyň başyndan bäri olaryň bahasy 31% ýokarlandy.
