«Google» 180 ýurtda elýeter bolan emeli aň (AI) Bard çat-botunyň täzelenen görnüşini hödürledi. Bu barada çarşenbe güni kompaniýanyň wise-prezidenti Sissi Sýao Google-yň web sahypasynda habar berdi diýip, TASS ýazýar.
Onuň sözlerine görä, täze wersiýa iňlis dilinden başga-da, ýapon we koreý dillerinde hem işlär we ýakyn wagtda ýene 40 dile goldaw berer. Ilkibada Bard-y diňe ABŞ-da we Angliýada iňlis dilinde ulanmak bolýardy.
Bard-yň täze wersiýasy beýleki Google hyzmatlaryna - Docs, Drive, Gmail we Maps-e birigip biler. Şeýle hem, matematika we logika boýunça ýöriteleşen PaLM 2 dil neýroseti çat-botuň bir bölegi hökmünde işlär.
Bard çat-boty şu ýylyň fewral aýynda tanyşdyryldy. Google gepleşik tertibinde işläp we adam söhbetdeşligini simulirläp bilýän emeli aň bilen işleýän çat-bot, ChatGPT-i ösdürmek üçin ozal 10 milliard dollar maýa goýan Microsoft bilen netijeli bäsleşmek üçin täze tehnologiýa döretdi.
