Iňlis sazandasy Ed Şiran iň meşhur aýdymlaryndan biri bolan «Thinking Out Loud-yň» ogurlykdygy baradaky kazyýet işinde ýeňiş gazandy. Nýu-Ýorkdaky kazyýet mejlisinde oturdaşlar ony başga biriniň materiallaryny göçürmekde günäkär hasaplamadylar.
Kazyýet işine oturdaşlaryň garamagy penşenbe gününe bellenip, üç sagat töweregi dowam etdi. Höküm yglan edilenden soň, Şiran "işiň netijesinden diýseň hoşaldygyny" aýtdy, ýöne "şular ýaly esassyz şikaýatlaryň kazyýete gelmegine gynanýan" diýdi.
Ozal aýdymçy kazyýet diňlenişiginde, eger kazyýet özüni günäli bilse, aýdym-saz karýerasyny bes etjekdigini we sahnadan gitjekdigini aýdypdy. Emma beýle bolmady. Kazyýet işi tamamlanandan soň ol: "Görýän welin, gündelik işimi taşlamasamam boljak öýdýän" - diýdi. "Eger emin agzalary bu meselede başgaça karara gelen bolsalar, onda aýdym ýazýanlar öz döredijilik erkinligi bilen hoşlaşaýmaly boljakdy".
Iňlis sazandasynyň üstünden arzany kazyýete Marwin Geý bilen bilelikde "Let's Get It On" aýdymyny ýazan aýdymçy Ed Taunsendiň mirasdüşerleri berdi. Aýdym 1973-nji ýylda çykdy. Taunsendiň maşgalasy Ed Şirany bu kompozisiýany ogurlamakda we 2014-nji ýylyň “Thinking Out Loud-nyň" esasynda akkordlaryň sinkopirlenen suratyny ulanmakda günäkärledi. Ol 2016-njy ýylda bu aýdym üçin “Gremmi” baýragyny alypdy.
