Täjigistan 2023-nji ýylda «Türkmenistan — Hytaý» gaz geçirijisiniň D şahasynyň gurluşygyna daşary ýurtly işçi güýjüni çekmek üçin kwota berer. 2719 hünärmen respublikanyň çägindäki işlere gatnaşyp biler.
Orient agentliginiň Asia Plus-a salgylanyp habar bermegine görä, bu barada maglumat Prezident Emomali Rahmon tarapyndan degişli karara gol çekilenden soň belli boldy.
Bu sanyň köpüsiniň Hytaýdan gelen hünärmenlere degişlidigi bellärliklidir. Gurluşyk işgärleriniň 70% tehniki işler, 30% administratiw işler bilen meşgullanar. Kwota Pekin bilen Duşanbäniň arasyndaky şertnama laýyklykda kesgitlenildi.
Täjigistan eýýäm taslamanyň durmuşa geçirilmegi üçin ähli zerur infrastrukturany, şol sanda umumy uzynlygy 60 km-den gowrak 42 tunel döretdi. Taslamanyň özi Täjigistana 3 milliard dollardan gowrak hytaý maýa goýumyny çekmäge mümkinçilik berer.
Gaz geçirijisiniň täze şahasy Hytaýyň Sinszýan-uýgur awtonom sebitiniň günorta we merkezi bölegine ýylda 30 milliard kub metr türkmen gazyny bermek üçin niýetlenendir. Gaz geçirijisiniň uzynlygy 1000 km töweregi bolar. Ol Özbegistanyň, Täjigistanyň we Gyrgyzystanyň çäginden geçer.
