Engadget portalynyň redaksiýasy 2023-nji ýylda satyn almak üçin maslahat berilýän birnäçe kategoriýada iň gowy Android smartfonlarynyň sanawyny düzdi. Iň gowy Android smartfony diýlip Google Pixel 7 Pro saýlandy. Bellenilişi ýaly, bu bazarda iň kuwwatly smartfon däl, ýöne Pixel 7 Pro-da öndürijilik ýetmezçiligi Google-yň programma üpjünçiligi bilen kompensirlenýär diýip, gazeta.ru belleýär.
OnePlus 11 orta klasdaky iň gowy Android smartfony kategoriýasynda ýeňiş gazandy. Bu gurluş pes baha uly ekranly, gowy kameraly we ýokary öndürijilikli smartfonlary isleýän ulanyjylar üçin laýyk bolar.
Iň gowy arzan smartfon Google Pixel 6a boldy. 6,1 dýuým OLED displeýli ykjam gurluş Google Tensor çibi, şeýle-de 6 GB operatiw ýat we 128 GB saklaýjy bilen üpjün edilendir.
Samsung Galaxy S23 Ultra iň gowy premium smartfon diýlip saýlandy. Bu flagman öndürijilikli demir, ýokary hilli ekran we bazardaky iň gowy kameralar ulgamynyň biri bilen enjamlaşdyrylan. Smartfon S Pen stilusyny götermegi bilen hem bäsdeşleriň arasynda tapawutlanýar.
Iň gowy eplenýän smartfon hökmünde Samsung Galaxy Z Fold4 saýlandy. Bu gurluş smartfony we planşeti öz içine alýar – Z Fold4 6,2 we 7,8 dýuýmly iki ekran bilen enjamlaşdyryldy. Şeýle-de, bu gurluşyň bazardaky IP68 standarty boýunça suwdan we tozandan goraga eýe bolan az sanly eplenýän smartfonlaryň biridigi bellenilýär.
