1444-nji hijri — 2023-nji milady ýylynyň Oraza aýy tamam boldy. Baýram aýynyň 1-i ähli musulman ülkelerinde Oraza baýramy ýa-da Agyzaçar baýramy hökmünde uludan bellenilýär. Ir säherde Baýram namazynyň okalmagy bilen birek-biregi gutlamaga başlanylýar. Süýji-kökeler, datly tagamlar paýlanylýar. Bu dünýä ýüzündäki ähli musulmanlar üçin esasy baýramlaryň biridir. Bu ýyl Oraza aýy 29 günden aýlanansoň, Baýram aýynyň 1-i 21-nji aprele, anna gününe gabat geldi. Anna gününiň özi hem Yslam dininde hepdäniň aýratyn toý-baýram güni hökmünde görülýändigi üçin iki baýramyň bir güne gabat gelmegini şowlulyga, gowulyga ýorýarlar. Yslam dinine uýýan ülkeleriň köpüsinde Baýram günleri dynç günleri diýlip yglan edilýär. Baýram günleriniň dowamlylygy her ýurda görä tapawut edip bilýändir.
Mysal üçin, Müsür Arap Respublikasynda 20-nji aprelde Gün batandan soň bellenilip başlanýan Baýram 25-nji aprelde hem dowam eder. Şeýlelik bilen müsürliler 6 gün baýram bellärler.
Saud Arabystany Patyşalygynda — 4 gün dowam eder;
Katar döwletinde 19-27-nji aprel aralygy baýram günleri diýlip yglan edildi. Metbugatda ýazylmagyna görä, işgärler 30-njy aprelde işe çykyp bilerler, çünki aprel aýynyň 28-29-njy günleri bu döwletde dynç günlerine gabat gelýär.
Birleşen Arap Emirliklerinde — 20-24-nji aprel aralygy;
Kuweýt döwletinde — 21-25-nji aprel aralygy;
Oman Soltanlygy, Ýemen, Iordaniýa, Yrak, Sudan — 21-24-nji aprel aralygy;
Marokko — 20-23-nji aprel aralygy;
Alžir — 21-22-nji aprel;
Liwiýa, Mawritaniýa, Komor adalary — 21-23-nji aprel aralygy;
Indoneziýa, Malaýziýa, Bangladeş, Pakistan, Eýran, Owganystan, Gana — 21-23-nji aprel günleri Baýram günleridir.
Agyzaçar baýramy biziň ýurdumyzda hem uly joşgun bilen bellenilip geçilýär. Baýram gijesinde hem-de Baýram namazy okalýança has köp dileg-doga etmek, şükür etmek, günälerimize toba etmek, Pygamber alaýhyssalama salawat okamak iň möhüm ybadatlaryň hatarynda görülýär. Mübärek Remezan aýynda tutan orazalaryňyz, berjaý eden tagat-ybadatlaryňyz, eden dileg-dogalaryňyz, paýlan sadaka-sahawatyňyz Hak dergähinde kabul bolsun! Ýeneki ýyllaryň Oraza aýy günlerine jan saglygynda ýetmek hemmämize miýesser etsin! Baýram gijesinde we säherinde etjek ybadatlaryňyz hem kabul bolsun! Yhlasyňyz ýerine düşsün, arzuwlaryňyz maksadyna gowuşsyn!
