Şu aý ähli döwürleriň iň meşhur kitaplaryndan biri bolan Antuan de Sent-Ekzýuperiniň «Kiçijik şazada» eseriniň neşir edilenine 80 ýyl dolýar.
Bu erteki-powest bütin dünýäde takmynan 140 million nusgada satyldy, birgiden filmleriň döremegine sebäp boldy, birnäçe ýüz dile terjime edildi we terjimeleriniň sany boýunça Injilden soň ikinji ýerde durýar. Eser fransuz dilinden türkmen diline hem terjime edildi we «Dünýä edebiýaty» žurnalynda çap edildi.
Bu eser ilkinji gezek 1943-nji ýylyň aprelinde ABŞ-da fransuz we iňlis dillerinde Reynal&Hitchcock neşirýaty tarapyndan neşir edildi. Fransiýada bolsa ýurt nemes goşunlaryndan azat edilenden soň çykdy. Eseriň awtory — professional uçarman, 1944-nji ýylyň 31-nji iýulynda harby tabşyrygy ýerine ýetirýän wagty aradan çykýar.
Sent-Ekzýuperiniň eserleri uruş ýyllary Wişiniň režimi tarapyndan gadagan edilipdi. "Kiçijik şazadanyň" 80 ýaşandygyna garamazdan, kitap entegem köp ýurtlarda halanyp okalýar. Onda Äleme syýahat edip, söýgi, ýalňyzlyk, dostluk we ýitgi temalaryndan söz açýan ýaş şazada hakda gürrüň berilýär.
