15 ýaşly aktýor Noa Metýuz Matofski Disney studiýasynyň filminde baş keşpleriň birini janlandyran Daun sindromly ilkinji aktýor hökmünde taryha girdi. Ol dramaturg Jeýms Metýu Barriniň adybir erteki-powestiniň esasynda ekranlaşdyrylýan "Piter Pen we Wendi" filminde ýetginjek Slaýtliniň keşbini janlandyrdy. Bu barada Daily Mail habar berýär.
Matofski taslamanyň döredilmegine gatnaşmagy onuň özi üçin “ajaýyp tejribe” bolandygyny boýun aldy.
“Meniň öz şahsy treýlerim boldy we köp dost tapyndym. Hemmämiz gylyçly söweşmegi öwrendik, bu meniň göwnüme ýarady. Şeýle hem gaty gysga wagtyň içinde köp tekst ýatlamaly boldum, ýöne bu gyzyklydy. Men muny juda haladym "- diýip, ýetginjek aktýor özünde galan täsirleri paýlaşdy.
Noa filmiň düşürilişine hemmeleriň bolşy ýaly düşdi: inklýuziw Zebedee zehinler gullugynyň kömegi bilen Disney-iň kasting geçirýändigini bildi we oňa gatnaşmak kararyna geldi. Aktýor materiallaryny diňleýişe iberdi, soň režissýor Dewid Louri bilen duşuşdy we onuň göwnünden turmagy başardy.
Matofski surata düşürmek tamamlanandan soň teatr kollejine okuwa girmegi meýilleşdirýändigini we "Daun sindromly beýleki artist bolmak isleýän adamlar üçin hem görelde bolmak" isleýändigini aýtdy.
