Şu gün, 7-nji aprelde Aşgabatda Bütindünýä saglyk güni mynasybetli Türkmenistanyň Prezidenti Serdar Berdimuhamedowyň we ýurdumyzyň ýolbaşçy düzüminiň gatnaşmagynda köpçülikleýin welosipedli ýöriş geçirildi.
Ýöriş Çandybil şaýolunyň hem-de Bekrewe köçesiniň çatrygynda ýerleşen “Welosiped” binasynyň ýanyndan badalga aldy. Ýöriş ugry Çandybil we Bitarap Türkmenistan şaýollarynyň ugry boýunça geçdi.
Şu ýylky welosipedli ýörişe Ýaş olimpiýaçylary taýýarlaýan mekdebiň hem-de Döwletliler köşgüniň çagalary, mekdep okuwçylary we ýokary okuw mekdepleriniň talyplary — jemi bir ýarym müňe golaý adam gatnaşdy.
Aşgabadyň merkezinde, Ruhyýet köşgüniň öňündäki meýdançada Bütindünýä saglyk gününe bagyşlanan köpçülikleýin welosipedli ýörişe gatnaşyjylar pellehana geldiler. Jemi geçilen aralyk 11 müň 200 metr boldy.
Şu gün Bütindünýä saglyk güni mynasybetli welosipedli ýörişler, dürli bedenterbiýe-sagaldyş we sport çäreleri ýurdumyzyň ähli welaýatlarynda-da guraldy.
