The Walt Disney Company kompaniýasynyň baş müdiri Bob Aýger kompaniýanyň 7 müň işgärini işden çykarmak prosesiniň başlandygyny habar berdi. Bu barada Aýgeriň Reuters agentligine gelip gowşan hatynda aýdylýar.
Kompaniýanyň baş müdiri Disney-iň geljek dört günüň dowamynda işgärleriň birinji toparyna işden çykarmak barada habar berip başlajakdygyny belledi. “Birnäçe müň işgäri” işden çykarmagyň ikinji, has uly tapgyrynyň aprel aýynda bolmagyna garaşylýar. Hatda bellenilişi ýaly, kompaniýanyň işgärlerini azaltmak prosesi 2023-nji ýylyň tomsuna çenli tamamlanar.
Kompaniýanyň işgärlerini köpçülikleýin işden çykarma prosesi çykdajylary 5,5 mlrd dollar azaltmak boýunça çäreleriň bir bölegidir.
Agentligiň çeşmeleriniň habar bermegine görä, işden çykarma kompaniýanyň Disney Entertainment we Disney Parks, Experiences and Products ýaly birnäçe uly bölümçelerine täsir eder.
