TikTok sosial ulgamy amerikan häkimiýetleriniň programmany ABŞ-da gadagan etmek baradaky bildirişleriniň esasynda potensial alyjylar bilen satuw barada gepleşikleri geçirýär. Bu barada çeşmelere salgylanyp, New York Post habar berýär diýip, interfax.ru belleýär.
“TikTok bilen potensial alyjylaryň arasynda gepleşikler işjeňleşýär. TikTok öz mümkinçiliklerine seredýär we 2020-nji ýylda Donald Trampyň prezident hökmünde programmany gadagan etjekdigini aýdan wagty göz öňünde tutulan ähtimal ylalaşyklary öwrenýär” – diýip, neşiriň çeşmeleri habar berdi.
Olar sosial ulgamyň kim bilen gepleşikleri geçirýändigini aýtmadylar, ýöne 2020-nji ýylda mümkin bolan hyzmatdaşlyk Oracle amerikan korporasiýasy we Walmart kompaniýasy bilen maslahatlaşylypdy. Şertnama baglaşylan ýagdaýynda olar TikTok-yň ABŞ-daky golçur kärhanasyny, ulanyjy maglumatlaryny we mazmuny gözegçilik astyna alyp bilerdi.
Geçen ýylyň ahyrynda ABŞ-nyň Kongresi TikTok sosial ulgamynyň federal hökümet telefonlarynda we elektron gurluşlarynda ulanylmagyny gadagan edýän kanun taslamasyny tassyklady. Fewral aýynda Ak öý ähli federal agentliklere TikTok-y ähli hökümet elektron gurluşlaryndan aýyrmak üçin 30 gün berdi.
Amerikan kanun çykaryjylary hem öz gezeginde Birleşen Ştatlaryň prezidentine programmany düýbünden gadagan etmäge mümkinçilik berjek kanun taslamasyna garamagy meýilleşdirýärler. Umumy alanyňda, ABŞ-nyň 13 ştaty eýýäm Hytaýda ýerleşýän ByteDance kompaniýasyna degişli bolan TikTok-a garşy çäre gördi.
Amerikan häkimiýetleriniň pikiriçe, HHR-iň hökümeti hytaý programmasyny amerikaly ulanyjylaryň maglumatlaryny ýygnamak üçin ulanyp biler. TikTok programmasynyň ABŞ-da 100 milliondan gowrak ulanyjysy bar.
