Kino režissýory we ssenariçi Kwentin Tarantino täze we ähtimal, soňky filmi üçin ssenariýanyň üstünde işlemegini tamamlady. Bu barada sişenbe güni The Hollywood Reporter habar berdi.
Onuň çeşmeleriniň maglumatyna görä, ssenariniň ady «Kino tankytçysy» (The Movie Critic) we wakalar 1970-nji ýyllaryň ahyrlarynda Los-Anjelesde ýaýbaňlanýar. The Hollywood Reporter filmiň baş gahrymanynyň zenan boljakdygyny aýtdy. Neşiriň çeşmeleri filmiň amerikan žurnalisti we iň täsirli kino tankytçylaryndan biri bolan Polin Keýle (1919-2001) bagyşlanyp biljekdigini belleýär.
Film üstümizdäki ýylyň güýzünde surata düşürilip başlanar. Tarantino entek filmi surata düşürmek barada haýsydyr bir kinostudiýa bilen şertnama baglanyşmady diýip, neşir habar berýär.
The Hollywood Reporter täze lentanyň 59 ýaşly Tarantinonyň karýerasyndaky iň soňky çeper filmi bolup biljekdigini nygtaýar. Neşir ozal režissýoryň aňry gitse 10 filmi surata düşürmegi meýilleşdirýändigini tekrarlap gelendigini ýatladýar. Žurnalyň bellemegine görä, eger "Billi öldürmek" (Kill Bill) boýewiginiň iki bölümini bir diýip hasap etsek, onda režissýoryň hasabynda dokuz sany film bar.
