“Garri Potteriň” esasynda döredilen Hogwarts Legacy oýny çykan gününden bäri ilkinji iki hepdäniň dowamynda 12 mln nusga tiraž bilen satylyp, işläp düzüjilere 850 mln dollar möçberinde girdeji getirdi. Bu barada oýny çykaryjy Warner Bros. Games kompaniýasynyň maglumatlaryna salgylanyp, Variety neşiri habar berýär. Muny gazeta.ru ýetirýär.
Bellenilişi ýaly, Hogwarts Legacy hem mukdar taýdan, hem pul taýdan Warner Bros. Games-iň rekordyny goýdy. Mundan başga-da, oýun geýmerler tarapyndan sarp edilen wagtyň mukdary boýunça-da çykaryjynyň rekordyny goýdy – 10-njy fewraldan 23-nji fewral aralygynda tutuş dünýä boýunça oýunçylar Hogwarts Legacy üçin 280 mln sagat sarp etdiler.
Oýun azyndan bir rekordy Warner Bros. Games-iň çäginden daşary goýdy. Twitch-de dürli strimerler tarapyndan Hogwarts Legacy oýnunyň geçilişine bir wagtyň özünde 1,28 mln tomaşaçy tomaşa etdi, bu hem “Ýekeleýin oýunlar” kategoriýasynda platforma üçin görlüp-eşidilmedik netijedir. Mundan öň rekord Cyberpunk 2077-ä degişlidi.
Bu haýran galdyryjy netijelere garamazdan, Hogwarts Legacy heniz täjirçilik potensialyny doly aýan etmedi. Häzirki wagtda bu täze oýny diňe PlayStation 5-de, Xbox Series X/S-de we ŞK-da oýnap bolýar, ýöne soňrak ol PlayStation 4, Xbox One we Nintendo Switch platformalarynda çykar we ol ýerde-de millionlarça tiraž bilen satylyp bilner.
