Mersedes-Benz kompaniýasy täze E-Class modeliniň salonyny görkezdi. Görnüşinden çen tutsaň, bu awtoulagyň täze nesli bolmaly: häzirki awtoulag 2016-njy ýyldan bäri öndürilýär we eýýäm restaýling geçdi.
Täze gural paneli tutuşlygyna üç sany reňkli ekrandan ybarat bolup, tutuş inine – gapydan-gapa ýerleşýär. Şol bir wagtyň özünde, sürüjiniň ýolagçylaryň görýän zatlaryna ünsi sowulmaz ýaly, olaryň görüş burçy ýörite çäklendirilendir. Elýeter hyzmatlaryň arasynda wideo oýunlar, onlaýn wideo we audio hyzmatlary, wideo konferensiýalar, esasanam, Zoom we başgalar bar.
Sürüji ýokardaky hyzmatlary, diňe awtoulag duralgada durka, oturan ýerinden ulanyp biler. Ulag ekrandan başga-da, içki döwrebap yşyklandyryş bilen ünsi özüne çekýär.
Kompaniýa bu modeli 2023-nji ýylyň aýagyna çenli Demirgazyk Amerikanyň bazaryna çykarmagy wada berýär. Awtoulagyň daşky görnüşi, oňa zawodda berlen adynyň ýaşyrylyşy ýaly, henizem gizlin saklanýar. Iň soňky Mersedes E kysymly sedanlaryň W210, W211, W212 we W213 zawod indeksleri bilen öndürilendigini ýatladýarys. Onda täze model W214 hökmünde taryha girer diýip çaklamak bolar.
