Marvel Studios-yň ýolbaşçysy Kewin Faýgi baş keşpde Tom Hollandyň bolmagy bilen “Möý adamyň” dördünji bölüminiň ssenariýasynyň üstünde işlenýändigini tassyklady. Ol sýužet barada ilkinji maglumatlar bilen hem paýlaşdy. Bu barada buro247.ru habar berýär.
“Biziň uly bir wakamyz bar. Bizde film üçin uly ideýalar döredi. Ssenariýaçylarymyz eýýäm ýazmaga başladylar” – diýip, Faýgi belleýär.
Häzirlikçe geljekki filmde Tobi Maguaýr bilen Endrýu Garfildiň çykyş etjekdigi belli däl. Öň, aktýorlaryň ikisi-de Möý adam baradaky ýene bir filmde surata düşmek mümkinçiligine oňyn seslenipdiler.
Şeýle-de, Faýgi üçünji “Dedpulyň” Marvel kinoäleminde 18+ reýtingli ilkinji film boljakdygyny nygtady.
“Bleýdi” hem geljek 10 hepdäniň dowamynda surata düşürip başlamak meýilleşdirilýär. Öň, Marvel kinony goýujy Bassam Tarigiň taslamadan gitmegi sebäpli filmiň önümçiligini togtatdy. Indi režissýoryň ornuny “Lawkraft ýurdy” serialynyň birinji bölümini surata düşüren Ýan Demanž eýeledi.
Ýakynda bolsa Amazon-yň Möý adam barada öz serialyny döretmegiň üstünde işleýändigi belli boldy. Ýöne baş keşbi kimiň ýerine ýetirjekdigi heniz belli däl.
