Gazagystanyň Türkmenistan hem-de Özbegistan bilen döwlet serhetleriniň gözegçilik-geçiriş nokatlarynda fewral aýynyň ahyryna çenli elektron nobat ulgamy ornaşdyrylar. Bu barada «Kazinform» agentligi Gazagystan Respublikasynyň Döwlet girdejileri komitetiniň metbugat gullugyna salgylanyp habar berýär.
Türkmenistan bilen serhetdäki «Temir-Baba» nokadynda bu hili hyzmat 22-nji fewraldan, Özbegistan bilen serhetdäki «Tažen» nokadynda 27-nji fewraldan işe giriziler. Geçiriş nokatlarynyň ikisi hem Gazagystanyň Mangistau oblastynda ýerleşýär.
2022-nji ýylyň 23-nji fewralyndan gazak-hytaý serhedinde «CarGoRuqsat» — elektron nobat hyzmaty ornaşdyrylypdy. Hyzmat Qoldau.kz sanly platformada işe girizilip, mugt işleýär.
Elektron nobat ulgamy gazak işläp taýýarlaýjylary tarapyndan döredilip, şolar tarapyndan ideg edilýär. Onda 7,5 müň töweregi ulanyjy bellige alnyp, nobat bronlamak boýunça 84 müň sany amal ýerine ýetirildi.
CarGoRuqsat elektron nobat ulgamynyň wezipesi ýük daşaýjylaryň deslapdan nobat bronlap bilmeginden hem-de bu nobatyň hemmelere mälim bolmagyndan ybarat. Munuň özi heniz bronlamak tapgyrynda ýük daşaýjylaryň format-logiki barlagdan geçmeginiň hasabyna ýük maşynlarynyň serhetden geçmek işini tizleşdirmäge ýardam eder. Ulgam sürüjiniň salgytlar, tölegler ýollardan ýöräni üçin bergisiniň barlygyny anyklaýar, tirkegiň registrasiýasyny we beýlekileri barlaýar.
