Gazagystanyň dünýä inen her bir raýatynyň awtomatiki usulda dollar walýutasynda toplaýyş hasaby bolar, bu bolsa her ýyl 1-nji ýanwarda Gazagystanyň Milli gaznasyndan çig mal pudagynyň hasabyna doldurylar. Bu barada Respublikanyň Maliýe ministrligi tarapyndan hödürlenen «Milli gazna — çagalar üçin» taslamasyna salgylanýan Tengri News neşiri habar berýär.
Taslamany ýurtda 2024-nji ýyldan başlap durmuşa geçirmek meýilleşdirilýär.
Şeýle nusganyň Norwegiýanyň Döwlet pensiýa gaznasynda hem ulanylýandygyny bellemelidiris.
Toplaýyş hasabyndaky serişdelerini raýatlar 18 ýaşyny doldurandan soň ulanyp bilerler.
Maýa goýum girdejileriniň mukdary Milli gaznanyň birnäçe ýyllap ortaça girdejisi derejesinde kesgitlener. Kämillik ýaşyna çenli hasaplarda toplanan puluň mukdary takmynan 3,5 müň dollar bolar diýlip çaklanylýar.
Toplanan pul iki zada sarp edilip bilner: bilim almak ýa-da jaý edinmek. Mundan başga-da, gozgalmaýan emläkleri diňe Gazagystanyň öz çäginde satyn alyp bolar, bilim almak babatynda bolsa, ony ýurduň daşyndaky bilime hem sarp etmäge rugsat berilýär.
Kämillik ýaşyna ýetensoň, hasapdaky serişdeler 5-10 ýyl saklanar. Eger talap edilmese, pul pensiýa hasabyna geçiriler. Şeýle hem, serişdeleri miras alyp bolar.
18 ýaşa ýetmedik raýat başga bir ýurda göçüp, raýatlygyny üýtgetse, töleg hukugyny ýitirer. Raýatlygy saklamak bilen başga bir ýurda göçüp barylanda tölegler galar.
