1912-nji ýylda «Titanigi» guran Belfastdaky Harland & Wolff gämi abatlaýyş kärhanasy täzeden işe başlar. Bu barada duşenbe güni Financial Times habar berdi.
Üç ýyl ozal iňlis telekeçisi Jon Wud gämi abatlaýyş kärhanasyny 6 million ýewro (7,3 million dollar) satyn alypdy. Onuň sözlerine görä, kompaniýa geçen aý Ispaniýanyň Navantia gämi gurluşyk kompaniýasynyň ýolbaşçylygyndaky konsorsium bilen üç sany harby-ulag gämisini gurmak üçin 1,6 milliard ýewrolyk (takmynan 1.8 milliard dollarlyk) şertnama baglaşdy.
Eýesiniň sözlerine görä, şeýle hyzmatdaşlyk gämi abatlaýyş kärhanasyna we häzirki wagtda Angliýanyň iň garyp sebitleriniň biri hasaplanýan Demirgazyk Irlandiýa täze durmuş getirer. Täze şertnamalar önümçilik kuwwatyny artdyrmaga mümkinçilik berer we 700-e çenli goşmaça iş ornuny döreder.
Neşiriň belleýşi ýaly, Harland & Wolff gämi abatlaýyş kärhanasy 1861-nji ýylda gurlupdyr, ýöne geçen asyryň ahyrynda Ýewropadaky we Aziýadaky kompaniýalaryň bäsdeşligi sebäpli peselip başlapdyr. Gämi abatlaýyş kärhanasy 2003-nji ýyldan bäri gämi gurmandyr.
«Titanik» ýolagçy gämisi 1912-nji ýylyň 10-njy aprelinde ýeke-täk syýahatyna ugrap, Sautgemptondan ýola düşüpdir. Ol 14-nji aprelden 15-nji aprele geçilen gije Demirgazyk Atlantikanyň suwundaky buz dagy bilen çaknyşypdyr we 2 sagat 40 minutdan soň gark bolupdyr. Heläkçiligiň netijesinde takmynan 1,5 müň adam aradan çykdy, 712 ýolagça we ekipažyň agzalaryna halas bolmak başartdy.
