Daşary ýurtlularyň Gazagystanda hemişelik ýaşamagy üçin ygtyýarnamany resmileşdirmegiň düzgünlerine üýtgetmeler girizildi. Bu barada Respublikanyň IIM-ine salgylanyp, interfax.ru habar berýär.
“Gazagystan bilen degişli migrasiýa şertnamalary bolan ýurtlaryň raýatlary içerki resminamalar arkaly biziň ýurdumyzda girip, çykyp, üstaşyr geçip, bir ýerden başga ýere göçüp we wagtlaýyn bolup bilerler. Ýöne daşary ýurtlulara Gazagystan Respublikasynda hemişelik ýaşamaga ygtyýarnama almak üçin daşary ýurt raýatynyň ýa-da raýatlygy bolmadyk adamyň şahsyýetini tassyklaýan we olaryň hukuk ýagdaýyny tassyklaýan resminama hökmünde daşary ýurt pasporty zerurdyr” – diýlip, Gazagystanyň IIM-niň Polisia.kz habarlar portalynda ýerleşdirilen habarda aýdylýar.
Şeýle-de, wagtlaýyn ýaşamaga rugsat almak üçin ýaşaýyş jaýynyň eýesiniň, ynanç haty boýunça onuň adyndan hereket edýän adamyň ýa-da zat eýesiniň notarius tarapyndan tassyklanan razyçylygynyň bolmagy hökmanydyr.
Üýtgetmelere laýyklykda, ygtyýarnama resmileşdirilende görkezilýän salgy hasaba alyş koduna eýe bolmaly.
“Bu çäreler daşary ýurtlularyň ýok salgylara, şeýle-de ýüz tutan adam bilen baglanyşykly bolmadyk salgylara hasaba alynmak mümkinçiligini aradan aýyrmak üçin edilýär” – diýlip, habarda bellenilýär.
