“Soçiniň” baş tälimçisi Gurban Berdiýew “RBK Sport” bilen söhbetdeşlikde Russiýanyň Futbol Birleşigine (RFB) Aziýanyň Futbol Konfederasiýasyna (AFK) geçmäge howlukmagyň gerek däldigini aýdyp, öz pikiri bilen paýlaşdy.
“Howlukmagyň zerurlygy ýok. Futbolçylaryň nesliniň ösüp ýetişmegi üçin bir-iki ýyl garaşmaly” – diýip, ol belleýär.
UEFA we FIFA tarapyndan sanksiýalar sebäpli rus klublary we ýygyndylary halkara ýaryşlaryna gatnaşyp bilmeýärler. Geçen ýylyň ahyrynda RFB-niň ýerine ýetiriji komiteti UEFA-dan AFK-a geçmek meselesi bilen meşgullanjak iş toparyny döretdi. Bu topar Aziýa geçmek meselesini, onuň oňyn we oňyn däl taraplaryny öwrener.
Berdiýew karýerasynyň dowamynda Russiýanyň we Aziýanyň futbol klublaryna üstünlikli tälimçilik eden tejribeli hünärmenleriň biridir. Ol Türkmenistanyň (1998/99) we iki gezek Russiýanyň (2008, 2009-njy ýyllar) çempionydyr. Ol AFK we UEFA zolaklarynda birnäçe gezek milli birinjilikleriň kuboklaryna we medallaryna eýe boldy. Berdiýewiň ýolbaşçylygynda Kazanyň “Rubini” iki gezek Çempionlar ligasynyň toparlaýyn tapgyryna gatnaşdy (2009/10, 2010/11), onuň topary Ýewropa ligasynyň 1/4 finalyna çykmagy başardy (2014). 2009/10-möwsüminde “Rubin” Çempionlar ligasynyň toparlaýyn tapgyrynda “Barselonany” utdy (2:1).
Ýatlap geçsek, geçen ýylyň noýabr aýynyň ahyrynda ol “Soçi” klubuna ýolbaşçy boldy. 70 ýaşly tälimçi bilen şertnama 2,5 ýyla niýetlenýär. Ol toparda Wadim Garaniniň ornuna geçdi.
