Maýorka adasyndaky (Ispaniýa) The Balance atly saýlama dikeldiş merkezi kriptosöwdasyna garaşlylykdan bejergi hödürläp başlady. Bi-bi-si-niň maglumatlaryna salgylanyp, rbc.ru saýtynyň bellemegine görä, terapiýany, massažy, ýogany we gezelenji öz içine alýan bejergi 4 hepde dowam edip, takmynan, 75 müň dollara barabar bolar.
Habarlar gullugynyň belleýşi ýaly, lukmançylyk edaralary soňky iki ýylyň dowamynda bu mesele boýunça ýüzlerçe arza kabul etdiler we indi dikeldiş merkezleriniň köpüsi şeýle hyzmatlary hödürläp başlady. Şol bir wagtyň özünde hünärmenler kriptogaraşlylygyň humarly oýunlara garaşlylyk bilen meňzeşdigini we olary bejermegiň usullarynyň biri-birinden kän tapawutlanmaýandygyny belleýärler.
Nýu-Ýorkyň “Family Addiction Specialist” kompaniýasynyň ýolbaşçysy Aaron Sternlihtiň aýtmagyna görä, kriptowalýuta söwdasynyň küýüne düşenler oňa “durmuşynda tolgunma we lezzet çeşmesi” hökmünde ýygy-ýygydan ýüz tutup başlaýarlar. Ol şeýle bozulmanyň alamatlary hökmünde uky kynçylyklaryny, günüň islendik wagty kriptowalýuta bahalaryna gözegçilik etmek islegini, gatnaşyklaryň, karýeranyň we bilimiň zyýanyna söwda etmegi belledi.
Ispaniýanyň dikeldiş merkezi kriptowalýuta söwdasyna ymtylmalardan kömek edýän ilkinji merkez däldir. Şotlandiýanyň Castle Craig Hospital hassahanasy heniz 2018-nji ýylda kriptosöwda garaşly bolanlar üçin stasionar bejeriş kursuny işläp düzdi. Bu programma humarly oýunlara garaşlylygy bejerişiň bar bolan usullaryna esaslanýar.
