Absolýut söweş çempionatynyň (UFC) iki agram kategoriýasynda öňki çempiony irlandiýaly Konor Makgregor UFC-ä gaýdyp gelip, amerikaly Maýkl Çendlere garşy söweşer. Bu barada promouşeniň prezidenti Dana Uaýt aýtdy diýip, TASS belleýär.
“Biz Ultimate Fighter 31 tälimçilerini [realiti-şouda] yglan etmek isleýäris: Konor Makgregor we Maýkl Çendler tälimçiler hökmünde biri-biri bilen söweşer. Möwsüm 30-njy maýdan 15-nji awgusta çenli dowam eder. Möwsümiň ahyrynda Makgregor we Çendler biri-biri bilen söweşer, söweşiň takyk senesi we geçiriljek ýeri heniz belli däl, ol ýakyn wagtda yglan ediler” – diýip, Uaýt aýtdy.
Makgregor 34 ýaşynda, ol garyşyk başa-baş söweşde 22 ýeňiş gazanyp, 6 ýeňlişe sezewar boldy. UFC-niň ilkinji titulyna 2015-nji ýylda eýe boldy, soňrak irlandiýaly guramanyň taryhynda bir wagtyň özünde dürli agram kategoriýalarynda (ýarym ýeňil we ýeňil) iki titula eýe bolan ilkinji söweşiji boldy. 2021-nji ýylyň iýul aýynda geçen amerikaly Dastin Porýe garşy soňky söweşinde Makgregor aýagyny döwdürdi.
Çendler 36 ýaşynda, onuň hasabynda garyşyk başa-baş söweşde 23 ýeňiş we 8 ýeňliş bar.
