Beýonse Renaissance World Tour atly halkara konsert syýahatyna başlajakdygyny mälim etdi. Aýdymçy bu barada özüniň Instagram profilinde gürrüň berdi.
Artistiň resmi saýtynda aýdylyşyna görä, syýahat 2023-nji ýylyň 10-njy maýynda Stokgolmdan başlanar we 27-nji sentýabrda Täze Orleanda konsert bilen tamamlanar. Aýdymçy Fransiýada, Germaniýada, Beýik Britaniýada, Niderlandlarda, Ispaniýada we Polşada çykyş eder. Şol bir wagtyň özünde saýtdan petek satyn almak mümkin däl. Görnüşine görä, ýüz tutýanlaryň aşa köplügi sebäpli, saýt agrama çydap bilmeýän bolarly.
Bu Beýonseniň soňky bäş ýylda ilkinji dünýä syýahaty bolar. Iň soňky sapar 2018-nji ýylda On the Run II syýahaty bolupdy. Şonda, CNN-iň habaryna görä, aýdymçy Demirgazyk Amerikada we Ýewropada 48 konsert beripdi.
Tizara täze syýahatyň bildiriş ediljekdigi baradaky myş-myşlar Beýonseniň Dubaýda Atlantis The Royal myhmanhanasynyň açylyş dabarasynda eden çykyşyndan soň başlandy. ArabianBusiness-iň habaryna görä, aýdymçy şol sapary üçin 24 million dollar alypdyr.
Aýdymçynyň Renaissance atly soňky albomy 2022-nji ýylyň iýul aýynyň ahyrynda çykdy.
