Jastin Biber öz eserlerine bolan awtorlyk hukugyny Hipgnosis Song Management we Blackstone maýa goýum gaznasynyň bilelikdäki kärhanasy bolan “Hipgnosis Songs Capital” iňlis kompaniýasyna satmak barada şertnama baglaşdy. Bu barada sişenbe güni Billboard habar berdi.
Neşiriň çeşmeleriniň berýän maglumatyna görä, bu şertnamanyň bahasy takmynan 200 million dollar töweregi bolupdyr. Şertnama görä, artist 2021-nji ýylyň 31-nji dekabryndan öň çykan ähli eserlerine, şol sanda Justice ("Adalat") atly soňky albomyna 100% awtorlyk hukugyny berýär.
Jastin Biber 2010-2021-nji ýyllar aralygynda alty sany studiýa albomyny çykardy. Mundan başga-da, onuň birnäçe singli bar. Üstesine aýdymçy 2010-njy ýylda “Bakylyga ilkinji ädim: meniň hekaýatym” atly terjimehal häsiýetli kitabyny hem çap etdirdi.
