Ululygy London şäheri bilen deňleşýän ägirt aýsberg Antarktidada Brant şelfinden döwlüp aýryldy. Bu barada Britaniýanyň antarktiki gullugy (The British Antarctic Survey, BAS) tarapyndan ýaýradylan habarda aýdylýar.
Onuň maglumatlaryna görä, takmynan, on ýyl mundan ozal hünärmenler Ueddella deňziniň golaýyndaky Kouts Ýeri kenarýakasy bilen serhetleşýän Brant buz şelfinde emele gelen jaýryklary öwrenip başladylar. 2016-njy ýylda aýsbergiň ýakyn wagtda bölünip aýryljakdygy baradaky çaklamalary göz öňünde tutup, britan polýar stansiýasy Halley kontinentiň jümmüşine 23 km süýşürildi.
Ýöne meýdany, takmynan, 1 550 inedördül km we galyňlygy 150 metre golaý bolan aýsberg şelfde saklanmagyny dowam etdi. BAS-yň maglumatlaryna görä, ägirt uly buz böleginiň gutarnykly bölünip aýrylmasy 22-nji ýanwarda bütindünýä koordinirlenen wagt boýunça 19:00 bilen 20:00 aralygynda bolup geçdi.
BAS-yň hünärmenleri bu ýagdaýy klimatyň üýtgemegi bilen baglanyşdyrman, antarktiki şelfiň tebigy özüni alyp barşy bilen düşündirýärler.
