Owganystanda Häkimiýete eýelik edýän “Taliban” hereketi transmilli TOPH (Türkmenistan-Owganystan-Pakistan-Hindistan) gaz geçirijisiniň taslamasynyň howpsuzlygyny üpjün etmek üçin ýörite güýçleri döretmäge taýýardygyny mälim etdi.
"Owganystan Yslam Emirliginiň gaýtadan dikeldilmegi bilen ýurtda howpsuzlyk doly üpjün edildi, bu häzir, öňkülere garanda, taslamany durmuşa geçirmek üçin has köp mümkinçilik döredýär "- diýip, "Taliban" hökümetiniň ykdysady meseleler boýunça wise-premýeriniň apparatynyň beýanatynda aýdylýar.
"Zerur halatynda Yslam Emirligi taslamany goramak üçin ýörite güýçleri döretmäge taýýardyr. Owganystan Yslam Emirligi ýurdy täzeden dikeltmegi we ykdysady infrastrukturany janlandyrmagy öz borjy hasaplaýar we syýasy, howpsuzlyk we ykdysady taýdan sebiti gülläp ösdürmek sebite agza ýurtlaryň umumy jogapkärçiligidir "- diýip beýanatda aýdylýar.
17-nji ýanwarda TOPH-nyň - Pipeline Company Limited-iň (TPCL) baş müdiri Muhammetmyrat Amanow Türkmenistanyň wekiliýetine baştutanlyk edip, Kabulda hereketiň güýç blogunyň ýolbaşçylary: "Talibanyň" Içeri işler ministrliginiň, Goranmak ministrliginiň we Baş aňtaw müdirliginiň wekilleri bilen duşuşdy.
"Içeri işler ministrliginiň Jemgyýetçilik goragy departamentiniň müdiri Mawlawi Hamas çykyşynda TOPH taslamasynyň owgan halky üçin örän wajypdygyny we Yslam Emirligi onuň howpsuzlygyny üpjün etmekde elinden gelenini gaýgyrmajakdygyny aýtdy" - diýip, "Talibanyň" Içeri işler ministrliginiň metbugat merkezi habar berdi.
