Niderlandly hüjümçi Memfis Depaý «Barselonadan» Madridiň «Atletikosyna» geçdi. Bu barada anna güni madridli toparyň metbugat gullugy habar berdi.
28 ýaşly hüjümçi bilen baglaşylan şertnama 2,5 möwsüme niýetlenendir. Transferiň bahasy 3 million ýewro + 1 million ýewro bonus boldy.
Depaý 2021-nji ýylyň iýul aýyndan bäri “Barselonada” oýnap, bu döwürde topar üçin 42 gezek çykyş etdi, 14 gol geçirdi, 2 gezek netijeli pas berdi. Şeýle hem ol fransuzlaryň "Lionynda", iňlisleriň "Mançester Ýunaýtedinde" we niderlandlaryň PSW-sinde oýnady. Ol Niderlandlaryň çempiony, Angliýanyň kubogynyň we Ispaniýanyň Super kubogynyň eýesi. Niderlandlaryň milli ýygyndysynyň düzüminde 86 oýunda 43 gol geçirdi, 2014-nji ýylda ol dünýä çempionatynyň bürünç medalyna eýe boldy. Transfermarkt portaly hüjümçini 20 million ýewro diýip bahalandyrýar.
«Atletiko» 28 utuk bilen 17 tapgyrdan soň Ispaniýanyň ligasynda dördünji orunda barýar. Barselona 16 oýundan soň 41 utuk bilen öňde barýar.
