15-nji ýanwarda bortunda 72 sany adam bolan ýolagçy uçary Nepalyň Pokhara howa menziliniň golaýynda heläkçilige uçrady diýip, Associated Press agentligi Kathmandu Post neşirine salgylanyp habar berýär.
Uçaryň degişli bolan Yeti Airlines awiakompaniýasy uçardaky ähli adamlaryň aradan çykandygyny tassyklady.
Nepalyň häkimiýetleri duşenbe gününi Pokhara şäherinde awiaheläkçiligiň pidalarynyň hormatyna Umumymilli matam güni diýip yglan etdi diýip, hindi metbugaty habar berýär.
Yeti Airlines awiakompaniýasynyň ýurduň paýtagty Katmandudan Pokhara (paýtagtdan 200 km günbatarda) ýerine ýetiren bu gatnawynda 72 adam, şol sanda 68 ýolagçy we 4 sany ekipaž agzalary bardy.
Deslapky maglumatlara görä, uçaryň tehniki näsazlygy heläkçiligiň sebäbi bolupdyr. Heläkçilik wagtynda Pokhara şäheriniň töwereklerinde howa şertleri we görüjilik oňat bolupdyr. Pokharanyň howa menzili wagtlaýyn ýapyldy.
Habar beriş serişdeleriniň maglumatlaryna görä, Nepalda ýere gazan ATR 72 uçarynyň bortunda 15 sany daşary ýurtly, şol sanda bäş sany hindi, dört sany russiýaly, iki sany koreýaly we Irlandiýanyň, Argentinanyň, Awstraliýanyň we Fransiýanyň 1 sany raýaty bolupdyr. Galan 53 adam Nepalyň raýatlary.
