Internet torunda JerryRigEverything ady bilen tanalýan tehnobloger Zak Nelson 2022-nji ýylda çykarylan iň berk we gowşak smartfonlardan reýting düzdi. Wideo YouTube-da ýerleşdirildi.
Bu sanawda birinji orny urga çydamly gajetlere ýöriteleşen hytaý kompaniýasyndan ykjam Android operasion sistemaly AGM H5 eýeledi. Nelson bu gurluşyň synag wagtynda döwüp bolmadyk örän berk korpusa eýedigini belläp geçýär.
Iň gowşak smartfon Asus ROG Phone 6 Pro boldy. Tehnobloger synaglaryň birinde gajeti hiç hili kynçylyksyz diýen ýaly iki bölege böldi.
Abatlaýyş işlerine has ýaramly telefon hökmünde hünärmen Google kompaniýasyndan Pixel 7 Pro-ny belledi. Onuň aýtmagyna görä, iPhone 14 hem gurluşyň arka gapagyny çalt aýryp bolýandygy sebäpli abatlaýyş işleri meselesinde özünden öňkülerden has aňsat bolup çykdy.
Şol bir wagtyň özünde Samsung Galaxy Z Fold 4 bilen Galaxy Z Flip 4 smartfonlarynyň eýelerine bu meselede kynrak düşýär. Nelson muny bu gajetleriň gurluş taýdan çylşyrymlydygy, gymmat komponentlere eýedigi we döwülmek ähtimallygynyň hem ýokarydygy bilen düşündirýär.
