Türkmenistanyň we Russiýanyň parlamentara komissiýasynyň birinji mejlisi 2023-nji ýylyň aprel aýynda Moskwada we Astrahanda geçer. Bu barada Russiýa Federasiýasynyň Federasiýa geňeşiniň wise-spikeri, Aşgabada iş sapary bilen gelen Konstantin Kosaçýow mälim etdi diýip TASS habar berýär.
Häzirki wagtda komissiýanyň ygtyýarlyklaryny kesgitleýän reglament, ara alnyp maslahatlaşylmaly meseleleriň topary we ähli guramaçylyk parametrleri doly ylalaşyldy diýip, Kosaçýow belledi. "Hususanam, biziň komissiýamyzy ýylda iki gezek - gezekli-gezegine Türkmenistanda we Russiýa Federasiýasynda geçirmek barada ylalaşdyk. Bu gatnaşyklaryň yzygiderliliginiň aňrybaş mümkin bolan derejesi" - diýip, rus wise-spikeri düşündirdi.
Onuň sözlerine görä, komissiýa ykdysady hyzmatdaşlyk boýunça meseleleri parlament gözegçiligine alýar. "Iki ýurtda-da hereket edýän hukuk-kadalaşdyryjy bazany kämilleşdirmek gerek. Käbir ýagdaýlarda aýratyn hökümetara ylalaşyklary, soňlugy bilen ratifikasiýalaşdyrmak arkaly, taýýarlamak gerek bolmagy mümkin." - diýip, Konstantin Kosaçýow belledi.
Komissiýa 2022-nji ýylyň noýabrynda Türkmenistanyň Mejlisiniň ýokarky palatasynyň başlygy Gurbanguly Berdimuhamedowyň Moskwa sapary wagtynda döredildi. Russiýanyň Federasiýa Geňeşiniň spikeri Walentina Matwiýenko bilen bolan duşuşygyň netijeleri boýunça "Parlamentara komissiýany döretmek hakynda" ylalaşyga gol çekildi.
"Ikinji mejlis geljek ýylyň sentýabr aýynda Aşgabatda we Türkmenbaşyda geçer" - diýip, Federasiýanyň Geňeşiniň wise-spikeri gürrüň berdi.
