Luis de la Fuenta Ispaniýanyň futbol boýunça milli ýygyndysynyň täze baş tälimçisi boldy. Bu barada penşenbe güni Patyşalyk ispan futbol federasiýasynyň metbugat gullugy habar berdi.
De la Fuenta bu wezipede Luis Enrikeniň ornuna geçdi, onuň wezipeden boşadylandygy hem penşenbe güni belli boldy. Enrikeniň ýolbaşçylygynda Ispaniýa Katarda dowam edýän dünýä çempionatynyň 1/8 finalynda Marokkodan ýeňildi (0:0, 0:3 – 11 metrlik urgularda). Milli ýygyndynyň baş tälimçisi hökmünde de la Fuenta 12-nji dekabrda tanyşdyrylar.
De la Fuenta 61 ýaşynda, ol Ispaniýanyň ýaşlar ýygyndysyna (21 ýaşa çenli) tälimçilik edýärdi. Öň, ol has kiçi ýaşlaryň ýygyndysyna tälim berýärdi. 2015-nji ýylda de la Fuenta Ispaniýanyň ýygyndysyny 19 ýaşdan uly bolmadyk oýunçylaryň arasynda Ýewropa çempionatynda, 2019-njy ýylda bolsa 21 ýaşdan uly bolmadyklaryň arasynda ýewropa birinjiliginde ýeňşe getirdi. Şeýle hem Ispaniýanyň ýygyndysy onuň ýolbaşçylygynda Tokiodaky Olimpiadanyň kümüş medalçysy boldy.
