Kredit ýa-da debet plastik kartlaryndan pula altyn teňňeleri satyn almaga mümkinçilik berýän bankomat Hindistanyň Haýdarabat şäherinde (Telengana ştaty) müşderilere hyzmat edip başlady. Bu barada bigasia.ru belleýär. “Ekonomik taýms” gazetiniň ýazmagyna görä, bu diňe bir Hindistanda däl, eýsem dünýäde hakyky wagtda işleýän ilkinji awtomatdyr.
Enjam bu gurluşyň üsti bilen altyn satmagyň innowasion tehnologiýasyny işläp düzen Goldsikka Pvt Ltd hususy kompaniýasy tarapyndan çykaryldy. Bankomat özüne 24 karat altyndan ybarat 5 kg teňňäni sygdyrýar, ol teňňeleri sekiz opsiýada – 0,5 gramdan 100 grama çenli satyn almaga mümkinçilik berýär. Bankomatyň möhüm aýratynlygy ekranda görkezilýän altynyň bahasynyň London biržasynda bu gymmat bahaly metal üçin bahalaryň üýtgemegine laýyklykda hakyky wagtda täzelenip durmagydyr.
Bankomat döwülmelerden ygtybarly gorag ulgamyna eýe. Ol içinde gurnalan wideokamera, ses signaly bilen üpjün edilen we polisiýa bilen aragatnaşyk liniýasy bar.
Goldsikka-nyň wekilleriniň belleýşi ýaly, enjam isleg bildirýänleriň ählisine banklara ýa-da altyn-kümüş dükanlaryna barmazdan, maliýe ýitgilerinden gaçyp altyna maýa goýmak üçin gowy mümkinçilik döredýär.
Ilkinji iş gününde innowasion bankomat 20 müşderä hyzmat etdi. Goldsikka Hindistanda şeýle bankomatlaryň üç müňüsini gurnamagy we öz önümi bilen dünýä bazaryna çykmagy meýilleşdirýär.
