Samsung kompaniýasy döwmek mümkin däl diýen ýaly smartfonlar üçin barmaklaryň yzyny skanerleýjiniň peýda boljakdygyny anons etdi. Bu barada SamMobile neşiri habar berýär diýip, lenta.ru belleýär.
Žurnalistler korporasiýanyň smartfonlarda maglumatlary goramak boýunça täze tehnologiýany oýlap tapandygyny görkezýän materiallaryna salgylandylar. Inženerler telefonyň belli bir funksiýalaryny blokdan açanyňda ulanyjynyň bir däl-de, üç barmagyny skanerlemegi teklip etdiler.
Samsung Display-iň hünärmenleriniň aýtmagyna görä, skanerlemede üç barmagyň bir wagtyň özünde ulanylmagy smartfony 2,5 mlrd esse ygtybarly edýär. Sarp edijiniň her barmakdan maglumatlary aýratynlykda girizmezligi üçin Samsung tutuş ýüzi skanerleýji giňişlik hökmünde çykyş edýän täze nesliň OLED displeýini oýlap tapdy. Şeýlelik bilen, sarp ediji eliniň üç barmagyny ekranyň islendik ýerine goýup biler.
Görnüşi ýaly, üç barmagyň kömegi bilen autentifikasiýa ulgamy sarp edijileriň gizlin maglumatlary bilen gatnaşykda ulanylar – mysal üçin, maliýe programmalary bilen işlenende. Samsung täze tehnologiýanyň brendiň smartfonlarynda haçan peýda boljakdygyny anyklaşdyrmady.
