Oksford sözlügi goblin mode (“goblin režimi”) aňlatmasyny ýylyň sözi diýip atlandyrdy. Bu barada Oksford uniwersitetiniň neşirýatynyň metbugat gullugy habar berdi diýip, TASS belleýär.
“Goblin režimi” aňlatmasy “ýaltalyk, sölpülik we açgözlük bilen häsiýetlendirilýän, jemgyýetçilik kadalaryny ret edýän özüňi alyp barşyň adatdan daşary egoistik modelini” aňladýar. Ilkinji gezek jümle 2009-njy ýylda “Twitterde” ulanyldy, ýöne 2022-nji ýylyň fewral aýynda gazetdir žurnallaryň sözbaşylaryny eýeläp, giň köpçülige ýaýrady. Bu adalganyň ýaýramagyna ýurtlaryň hökümetleri tarapyndan COVID-19 pandemiýasy bilen baglanyşykly girizilen çäklendirmeleriň ýatyrylmagy ýardam etdi.
“Ähtimal, aňlatmanyň giňden ýaýramagy “kadaly durmuşa” gaýdyp gelmek pikirini ret edýän ýa-da sosial ulgamlarda görkezilýän barha ýetip bolmajak estetik ülňülere we ýaşaýyş durmuşyna garşy çykýan adamlara mahsus bolan ýagdaýy görkezýär” – diýlip, habarda bellenilýär.
Oksford sözlügi ilkinji gezek ýylyň sözüni onlaýn görnüşde geçirilen jemgyýetçilik ses berişliginiň netijesi esasynda saýlady. Pikir soraşma 300 müňden gowrak adam gatnaşdy. Ikinji orny “metaverse” sözi eýeledi, üçünji orunda #IStandWith heştegi ýerleşdi.
