BMG-niň Baş sekretarynyň ýörite wekili hem-de ştab-kwartirasy Aşgabatda ýerleşen BMG-niň Merkezi Aziýa üçin öňüni alyş diplomatiýasy boýunça sebit merkeziniň ýolbaşçysy Natalýa German BMG-niň Kontrterrorçylyk komitetiniň ýerine ýetiriji direktoratynyň ýerine ýetiriji direktory wezipesine bellenildi. Bu barada guramanyň resmi Twitter sahypasynda habar berildi.
«Birleşen Milletler Guramasynyň Baş direktory Antoniu Guterriş Natalýa Germanyň (Moldowa Respublikasy) Howpsuzlyk Geňeşiniň razylygy bilen KTKÝÝD-niň ýerine ýetiriji direktory wezipesine bellenendigini tassyklady» - diýlip habarda aýdylýar.
German bu wezipede Belgiýadan Mişel Koninksiň ýerine geçer.
Natalýa German — Moldowanyň ilkinji prezidenti Mirça Sneguranyň gyzy, 2013-2016-njy ýyllarda ýurduň daşary işler we ýewropa integrasiýasy ministrliginiň ýolbaşçysy boldy.
2016-njy ýylyň fewralynda German Hökümet tarapyndan BMG-niň Baş sekretarlygyna hödürlenildi, ol altynjy dalaşgär boldy. Emma ses berlişigiň netijeleri boýunça Portugaliýanyň öňki premýer-ministri Antoniu Guterriş bu wezipäni eýeledi.
2017-nji ýyldan häzirki wagta çenli German BMG-niň Baş sekretarynyň ýörite wekili we BMG-niň Merkezi Aziýa üçin öňüni alyş diplomatiýasy boýunça sebit merkeziniň ýolbaşçysy wezipelerini eýeläp gelýärdi.
