20-nji noýabrda badalga aljak futbol boýunça dünýä birinjiligi ugrundaky ýaryş häzirki zaman futbol dünýäsindäki iki läheň ýyldyz bolan Lionel Messi hem-de Kriştian Ronaldu üçin iň soňky dünýä çempionaty bolmagy mümkin. Bu hakda Ýewropa hem-de Ýakyn Gündogar ýurtlarynyň metbugatynda beýan edilýär. Ençeme ýaş nesilleriň seždegähine (kumirine) öwrülen ala topuň ezber ussatlary bu hakdaky öz pikirlerini köpçülikleýin habar beriş serişdeleri bilen hem paýlaşýarlar.
«Futbol talaplaryna laýyklykda «ýaşym bir çene bardy»
Bu wagt özümi gowy duýýanam bolsam, hemişe bu durkumy saklap bilmezligim mümkin we isleseň-islemeseň, bu ýagdaý oýnuň netijeliligine täsirini ýetirer. Şonuň üçin Katardaky dünýä çempionatyndan soňra geljegim hakda düýpli pikirlenerin. Täzeçe bir karara gelerin» diýip, Kataryň Doha şäherinde gurnalan metbugat brifinginde çykyş eden Lionel Messi öz pikirlerini paýlaşdy. «Şonuň üçin Katardaky dünýä çempionatynyň hemişelik ýagşy ýatlamalara hemra etmegi üçin oýun meýdançasynda özümi doly görkezmäge yhlas ederin» diýip, ussat türgen sözüniň üstüni ýetirdi. Edil şeýle ýagdaý Kriştian Ronaldu üçinem degişlidir. «Katarda geçiriljek futbol boýunça dünýä çempionatynyň dünýä çempionatlarynyň taryhynda iň gowusy boljakdygyna ynanýaryn» diýen sözlerini, Kataryň Al-Jazeera saýty habar berýär.
Has täsin ýeri-de, bu iki ägirtde futbol dünýäsinde bolup biläýjek abraýly derejeleriň we sylaglaryň diňe birjesinden galan ählisi bar. Bulara diňe dünýä çempiony bolmak ýetenok. Ähli bäsdeşlerinden rüstem gelip, finala çykaýanlarynda hem bularyň birisi barybir bu derejäni gazanmazdan, futbol bilen hoşlaşmaly bolar. Çünki, futbol boýunça dünýä çempionaty bularyň diňe birini ýeňiji edip biler. Oýnuň düzgüni şeýle. Futbol bilermenleri Argentinanyň hem-de Braziliýanyň milli toparlaryny finala çykyp biljek iki sany esasy topar hökmünde göz öňünde tutýarlar.
