160 mln ýewrolyk EuroMillions ýewropa lotereýasynyň nobatdaky tiražynyň baş baýragy geçen anna güni oýnaldy we ol Fransiýanyň ýaşaýjysyna nesip etdi. Bu barada şenbe güni Le Parisien gazeti ýazdy diýip, TASS habar berýär.
Neşiriň takyklamagyna görä, bu lotereýanyň tutuş taryhynda Fransiýada iň uly ýedinji utuşdyr. Ýurtda iň uly utuşy 2020-nji ýylyň 15-nji oktýabrynda Fransuz Polineziýasynyň ýaşaýjysy alypdy, oňa nesibeli petegi 220 mln ýewro getiripdi.
Bagty çüwen adamyň şahsyýeti köpçülige aýan edilmeýär, diňe bir zat belli, ol hem utuşly bilet respublikanyň Pa-de-Kale departamentinde satyn alnypdyr. 1 mln ýewro utan käbir ýeňijiler utuş hakynda garyndaşlaryna, aýratynam çagalara aýtmandyklaryny, sebäbi bu habary deň-duşlarynyň ýanynda gürrüň eden çagalary päliýamanlaryň pul üçin ogurlamaklarynyň mümkindigini, şondan howatyr edýändiklerini boýun aldylar.
Ýeňiji baýraga bolan hukugyny mälim etdimi ýa ýok, heniz belli däl - munuň üçin oňa 60 gün möhlet berilýär. Şu möhlete çenli utuşa hiç kim eýe çykmasa, 10 mln-dan uly utuşlar lotereýanyň dolanyşygyna gaýtarylyp berilýär. Şondan az pullar bolsa, 2019-njy ýylyň kanunyna laýyklykda , döwletiň girdejisine öwrülmeli. 2020-nji ýylda fransuz gaznasy şeýle görnüşde 70 mln ýewro, 2021-nji ýylda bolsa 150 mln ýewro artdy.
