Dünýä ýurtlarynyň 120-den gowragynyň Prezidentleri we Hökümet Baştutanlary golaýda Müsüriň Şarm-eş-Şeýh şäherinde geçiriljek BMG-niň Howanyň üýtgemegi boýunça Çarçuwaly konwensiýasyna gatnaşyjy taraplaryň 27-nji maslahatyna (COP27) gatnaşjaklaryny tassykladylar. Bu barada 4-nji noýabrda COP27-de ýolbaşçylyk edýän Müsüriň ýörite wekili Abu Majid sammite bagyşlanyp, onlaýn görnüşde geçirilen metbugat maslahatynda habar berdi.
Abu Majidiň: “Azyndan 121 ýurtdan döwlet we Hökümet Baştutanlarynyň gatnaşmagyna garaşýarys, bu san köpelip hem biler” diýen sözlerini trend.az öz habarynda getirýär.
Onuň sözlerine görä, HHR-iň Başlygy Si Szinpiniň we Hindistanyň Premýer-ministri Narendra Modiniň sammite gatnaşjakdygy tassyklanylmady. Muňa garamazdan, şu ýylky sammite Afrika ýurtlarynyň köpüsiniň Liderleri gatnaşarlar.
Müsür sammite raýat guramalarynyň köp sanlysynyň gatnaşmagyna hem garaşýar. Respublikanyň diplomatik wekilhanalary çärä gatnaşjaklaryň 1500 töweregine wiza berdi. COP27 sammiti 6 — 18-nji noýabr aralygynda geçiriler.
